Sulisussarsiorneq

Atorfimmut pilersinneqaqqammersumut sulisussarsioqqippugut. Nunarput inuilu pillugit paasissutissanik siammarterillaqqissumik isumassarsiullaqqissumillu Groenlandicami atorfinittussarsiorpugut.

Atorfininnissaq 1. decembari 2018

Atorfik pillugu

Eqqumeeqqinnaanik soqutigisaqarpit allanullu nittarsaakkusussinnaasannik?

Groenlandicap katersugaatai nittarsaassinnaavigit inunnut assigiinngitsunik soqutigisaqarsinnaasunut? Takoqqusaarusioriaatsinut nalinginnaasunut digitaliusunullu tappitsuuvit? Nammineerlutik arlalinnillu suleqateqarlutit eqaatsumik matoqqanngitsumik sulisinnaaguit tassa illeqqissaaq atorfissaqartippatsigit.

Atorfimmut nutaamut pilerseqqammisatsinnut nittarsaassillaqqissumik suleqatissarsiorpugut, ineriartortitsisinnaasumik, suleqatigisinnaasanik nutaanik attaveqalersinnaasumik sullissilluarsinnaasumik.

Groenlandica Nunatta Atuagaateqarfiata immikkoortortaraa taamaattumik atorfinikkuit naatsorsuutigissavat akunnialuit Nunatta Atuagaateqarfiani aamma sulisarnissat.

Naatsorsuutigisinnaavat makku suliarisassallugit:

Nittartagartaatsinnik ineriartortitsineq immersuinerlu
Saqqummersitanut, aaqqissuussanut immaqalu allaatigisassanut oqaasertalersuineq.
Groenlandica Facebookikkut nittarsaattarnissaa
Quppersakkanut pjecinillu ilusilersuineq sananerlu
Paasissutissanik ujaasineq misissuinerlu
Nalunaarsuineq (katalogisering) taanna pingaarnertut suliassaassanngilaq
Ilimmarfiup atuagaateqarfiani vagteqartarneq arfininngornikkulu tulleriiaalluni vagteqartarnernut ilaaneq
Kissaatigaarput

Suliassanut assigiinngiiaartunut suliaqarnissamut ammasuussasutit
Katalogiseriinermik misilittagaqassasutit soqutiginnillutilluunniit, suliassat pingaarnerit ilagimmassuk
Nittartakkakkut Facebookikkullu Groenlandica saqqumilaartissinnaagit
Ammasuussasutit, inussiarnersuussasutit, isumassarsiullaqqissoq, tatitooq suleqatiginnilluarsinnaasorlu
Ilisimasanik soqutiginartumik pissanganartumillu suliffeqarfimmut tamarmut ingerlatitseqqiisinnaasoq
Oqaatsinik arlalinnik atuisinnaasoq
Kalaallit Nunaannut soqutigisaqartuunissat paasisaqarusussuseqartorlu
Uagut pilluta

Groenlandicap Ilisimatusarfik Ilimmarfimmi illoqatigaa
Groenlandicap kulturikkut kingornussassanik katersineq, immikkoortiterineq nalunaarsuinerlu suliarisarpai
Suliffik periarfissarpassualik suleqatigiiffiulluartoq
Groenlandica suliffeqarfiarannguuvoq (Illit ilanngullutit ulloq naallugu inuit sisamaassaagut. Nunatta Atuagaateqarfiani inuit 14-it.)
Suliffeqarfik ineriartortitsiuarnissamik pingaartitsisoq
Peqqissaarlutalu ilumoorsaartaraluarluta quiasaaqatigeeriasaartarpugut
Qinnuteqarfissaq ulloq kingulleq 8. oktobari 2018

Oqaloqateqarnerit pissapput sapaatip-akunnera 41-mi

Inissaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Akissarsiat atorfininninermilu atugassarititat
Akissarsiat- aamma atorfininnermi atugassarititat, atorfininnermi soraarnermilu angalaneq, Namminersorlutik Oqartussat kattuffiullu ilaasortaaffigisap isumaqatigiissutaat atuuttut malillugit.

Paasissutissat erseqqinnerusut

Atorfik pillugu paasisaqarnerorusukkuit pisortaq attavigisinnaavat Elisa Petersen (elisa@katak.gl – tlf.: +299 348921). Atuagaateqarfiit pillugit annertunerusumik paasisaqarusukkuit www.katak.gl alakkararuk.